【語言篇｜西班牙文大解構】

冇錯，西班牙有4個官方語言！

上個post所講世界第三大嘅西班牙文係Spanish，又稱Castilian (用嚟區別佢同其他官方語言嘅時候所用嘅別名)，係全西班牙最被廣泛使用嘅語言，而其餘3個嘅分別係Catalan、Galician同Basque，究竟呢4個語言有咩相似點同分別、又各自有幾多人用緊？以下就逐一同大家講解～

先講Castilian，西班牙有8成人都係以佢為母語，普及度非常高，北中南部都係佢嘅覆蓋範圍，即使係西班牙主要講Catalan/ Basque/ Galician嘅地區，絕大部分人其實都識用Castilian溝通，所以識Castilian基本上就可以走遍西班牙。而佢同Catalan同Galician都好近似，三者都隸屬於拉丁語族，相似字詞非常多，數據上Castilian同兩者嘅相似度各自都超過8成㗎！

至於第二多人講嘅就係Catalan喇，佢係東北面加泰隆尼亞自治區嘅主要語言，以佢為母語嘅人口大約佔10%，西班牙第二大城市巴塞隆拿正正就係講Catalan㗎喇。語言學上嚟講，佢其實都包埋東面城市Valencia所講嘅語言Valencian、同Balearic Islands講嘅Balearic，因為兩者同Catalan係屬於方言關係，所以換句話說東至東北面就係Catalan嘅覆蓋範圍喇～

跟住嚟到Galician，佢係西班牙本土嘅第三大語言，覆蓋範圍主要係西北面嘅加利西亞自治區，大約5%嘅人口以佢為母語。除咗Castilian，佢同葡萄牙文都非常相似，相似程度之高甚至係識Castilian或葡文嘅人都會基本上聽得明Galician！

最後嚟到Basque，佢係最少人講嘅官方語言，只有1%人口以佢作為母語，主要位於北面嘅巴斯克自治區，但佢嘅神秘色彩係最濃厚嘅，點解？因為佢係個孤立語言，即係同世界上所有現存語言都冇關聯，同西班牙文都完全唔同，由字詞、語法到發音冇一樣係相似嘅，來源至今都冇人知，但係莫名地存在喺西班牙境內。某啲語言學家主張Basque其實係最遠古嘅歐洲語言之一，喺拉丁文普及之前早已存在，傳承至今就成為咗西歐唯一殘存嘅古歐洲語言，而真相係咪咁就無從稽考喇。

唔講係咪以為全個西班牙都講同一款西班牙文呢？除咗以上4個官方語言，其實西班牙仲有一堆方言呢度仲未介紹㗎，不過篇幅有限就唔逐一講解啦，但希望呢個post有幫到大家了解西班牙嘅地區&語言特色啦～