【講咁多 咁究竟jamón要點食？】

♦️切火腿嘅學問

今日要講解嘅喺風乾火腿上枱前嘅最後一個步驟 —— 切片。冇錯，唔好以為切火腿好似街市肉檔剁肉咁簡單，喺西班牙切風乾火腿係一門專業嚟，西班牙文叫”cortador de jamón”，即係「風乾火腿切割員」，切得一手好jamón係非常受尊敬㗎！當然除咗手切火腿，仲有得揀用機器切，咁究竟兩者有咩分別？就要睇落去喇～

先講手切，專業嘅火腿切割員係要先經歷幾年嘅訓練，除咗了解豬嘅身體構造同紋理、磨練刀功，仲要培養出品評火腿味道、質感嘅能力，以致了解埋唔同火腿各自適合嘅食用配搭；至於機切，係大企業要做量產嘅時候會用嘅生產方式，每塊火腿形狀大小厚度都會更均勻一致，但如果比較手切同機切嘅jamón，毫無疑問地一定係手切更加好，而呢部份可以分為外觀同口感去解釋。

外觀上，手切嘅火腿會根據紋理、肥瘦比例喺角度同力度上作調整，切出嚟嘅火腿片雖然冇咁一致，但係呢個切法可以更加確保到每塊都有住最恰當嘅質感同厚度。口感上，手切嘅火腿肥瘦比例更好、食落會更有咬口，而機切嘅有可能會因機器熱力而令火腿油脂溶化流失，而且切法甚少調整，所以就未必有咁好嘅比例同風味喇～

總括嚟講，手工切割嘅風乾火腿都係經過精心處理，佢所包含嘅精準度同細緻度係機器複製唔到㗎！所以如果大家嚟到西班牙，非常推薦去下啲jamón店，睇下班火腿師傅係點樣逐塊火腿切出嚟，順便試食下手切同機切火腿嘅分別😆～

【風乾火腿嘅迷思】

♦️醃製火腿仲唔係肥膩嘢？

講完製作過程，分享吓jamón嘅營養價值。雖然jamón 作為醃製食品，睇落好鹹好肥膩，又似高油鹽高膽固醇，但係其實佢嘅營養價值並唔係真係咁低㗎，一齊嚟睇吓點解～

脂肪嚟講，製作火腿採用嘅伊比利亞黑毛豬的確係肥肉多啲嘅，佢哋嘅出名之處都在於擁有「大理石紋理」脂肪，但係當中嘅脂肪多於70%其實都係不飽和脂肪（豐富omega-3)！呢種脂肪有助降低膽固醇水平，可以保持血管暢通。 而且風乾火腿中含有豐富嘅蛋白質，每100g嘅風乾火腿，就大概有30-35g係蛋白質。再加上佢有齊鋅、鐵等礦物質，所以認真計起上嚟，其實佢嘅營養價值冇想像之中咁差，甚至可以係降膽固醇同補充各種營養嘅食物嚟！


當然，風乾火腿仍然係一種高鈉食品，所以都要注意攝取量，建議一個星期唔好食超過300g，如果每餐食薄薄幾片係絕對唔需要擔心嘅，反而仲對身體有益添！


【講咁多 咁究竟jamón要點食？】

♦️食用&存放指南

終於講到佢嘅保存方式同埋大家最關心嘅食用方法喇！Jamón 唔使煮、都唔會攞嚟煲湯（not金華火腿🤣），開包裝直接食就ok。而好多香港人都會將風乾火腿配哈蜜瓜食，但呢個當然唔係唯一選擇啦，嚟緊就同大家逐一介紹jamón喺西班牙嘅常見配搭食物！

🧀 芝士：
最常見嘅係manchego, goat同brie, 芝士嘅奶油味可以喺Jamón嘅鹹香味上加多個層次，係西班牙餐枱上最常見嘅配搭。

🍷 紅酒/白酒：
西班牙人好鐘意食jamón配少少酒，酒嘅甜同酸味可以去除到jamón嘅油膩感，但同時又突顯到jamón本身嘅鹹香，兩者係互相加乘嘅配搭。

🥖 麵包：
麵包味道較輕，既可以中和火腿嘅鹹味，又減低到油膩感，配搭濃味嘅Jamón可謂絕配。通常西班牙人就係食jamón三文治做早餐㗎喇～

🫒橄欖：
橄欖酸中帶甜、略有清新嘅味道，襯托濃郁嘅jamón係非常夾嘅選擇，既可以可以降低油膩感，又添加到一重橄欖香。

🍈哈密瓜：
相比之下，香港人最常用嘅哈密瓜係以上幾個配搭之中比較冇咁common嗰款，但佢都係唔少餐廳或者家庭會用嘅傳統配搭。佢嘅甜味同水份可以完美抵銷到jamón嘅鹹同油膩，如果初初食jamón嘅話呢個係最易入口嘅配搭嚟。

至於保存方式，市面上買返嚟嘅jamón通常都已經係真空包裝，食物品質上唔需要擔心，但係為咗防止外在溫度影響佢嘅味道質感，建議都係保存喺雪櫃入邊，keep住喺0-4度之間就唔會咁易變質喇。要留意嘅係，食之前最好喺雪櫃拎返出嚟放15分鐘，等佢變返室溫再食，咁就可以確保佢啲油脂會入口即溶，食用體驗會更正！

最後，希望大家學識點食風乾火腿之餘，都喺呢一系列嘅火腿post學到少少關於風乾火腿嘅小知識，將來嚟到西班牙旅行至少識揀火腿、同知自己食咗啲咩落肚啦😆～