打親招呼，香港人都慣咗問句「你食咗飯未呀？」一餐飯除咗用嚟填肚，更加係大家敘舊傾計嘅場合。不過如果攞呢個問題問西班牙人嘅話，99%都肯定會話「未！邊會咁早食吖？」
冇錯，西班牙人絕對係全世界最遲食飯嘅民族！簡單嚟講，將香港人嘅飯鐘褪遲兩至三粒鐘，就大概係西班牙人嘅食飯時間喇～ 以下我哋就詳細啲比較吓西班牙人同香港人嘅三餐有咩分別啦！
♦早餐篇
對於要翻工翻學嘅人，平時大概都係7-8am食早餐，當然西班牙嘅打工仔都唔例外，但係有趣嘅位在於，佢哋係會食第二餐早餐㗎，即係我哋平時講嘅”brunch” ！點解會咁？係因為唔少公司都會喺10-11am左右放個break仔，俾佢哋出去飲杯咖啡、食啲小食，所以唔少西班牙人都會有食兩次早餐嘅習慣。
不過，早餐喺西班牙傳統並唔係好重要，好多人翻工前只係飲杯咖啡，放break先食兩條churros咁，唔志在食多，最緊要夠chill，叉夠電再翻去做嘢。
♦午餐篇
論重要性，晏晝飯絕對係西班牙人最重要嘅一餐。即係有幾重要？唔講你都未必知，就算係打工仔都足足有三個鐘放晏晝飯時間，食飽瞓個晏覺都仲得添。
而呢三個鐘通常就係指2-5pm，習慣上唔少人都係3pm先會去食嘢，而食親都大概個半至兩粒鐘。相信對於由學生時期已經只得一個鐘食晏嘅香港人嚟講，真係充滿羨慕妒忌恨。而對西班牙人嚟講，一餐完滿嘅晏晝飯包括前菜、主菜、飲品、甜品同咖啡。食飽就大概4點幾5點，要繼續翻工嘅就翻工，唔洗嘅就通常翻屋企瞓個晏覺，認真寫意～
♦晚餐篇
聰明嘅你可能已經諗到，晏晝飯都3點先食，咁個晚餐咪臨瞓食？！冇錯㗎，香港人食晏同食晚飯中間要7-8個鐘消化下，西班牙人都唔例外。佢哋基本上夜晚9點打後先開始叫dinner時段，甚至9點半10點先食，都係完全正常嘅。當然啦，由於距離瞓覺時間都好近，佢哋並唔會食好多嘢，可能麵包夾芝士同Jamón (西班牙火腿），咁已經係一餐。想盡興啲嘅，可能夜晚11點仲會出去同friend小酌一杯啤酒、吹下水咁，咁樣先叫完整食完佢哋嘅一日「三」餐。