【甜品篇｜卡達拉娜嚟自西班牙？】

繼西多士之後，第二個同西班牙有血緣關係嘅甜品就係壽司郎名物「卡達拉娜」喇！相信熱愛壽司郎嘅大家都必定食過佢，可能你會問：

「Nani?! 壽司郎嘅甜品又關西班牙事？」

冇錯，真係關事！「卡達拉娜」其實係西班牙加泰隆尼亞焦糖燉蛋嘅改版，名都係翻譯自呢個甜品嘅西班牙文名 “crema catalana”。雖然經過日本人改造之後，兩者味道同質感上都有明顯嘅分別，但可以肯定嘅係，卡達拉娜無論係個名定係做法，靈感都係源自西班牙嘅呢款甜品嘅，以下就嚟睇吓佢哋有咩相似點同差異啦！

先講相似點，兩者嘅base其實都係用蛋、牛奶同糖做嘅，而因應各自嘅味道同質地佢哋會有各自嘅香料同步驟；第二樣就係焦糖，佢哋兩款甜品最後都會加糖燒成焦糖面，所以兩者算係基本材料上相通嘅。

不過，佢哋最後呈現嘅口感同味道其實係好唔同嘅！質感上，大家所熟悉嘅卡達拉娜係冰住食，口感硬硬地似雪糕；但係crema catalana係較為軟身嘅燉蛋質地、入口即溶。味道上，卡達拉娜非常重雲呢拿味，蛋味稍為輕啲；而crema catalana就係蛋味濃郁啲，仲會帶少少玉桂同檸檬味嘅餘韻，所以會清新少少～

P.s: 可能你又會問「咁其實crema catalana係咪即係crème brûlée呀？」「西班牙個款焦糖布丁唔係叫natillas咩？」呢兩條問題就留待下回分解喇，有興趣嘅朋友記住留意我哋下一個post～