【語言篇｜s,c,z讀法有幾種？！】

上個post介紹咗西班牙嘅4個官方語言，今次就再仔細少少睇下「口音」呢個主題！西班牙文(Spanish)作為橫跨拉丁美洲同歐洲嘅語言，當然存在住各式各樣嘅口音，要逐個講嘅話水蛇春咁長，所以呢個post就同大家focus返喺西班牙本土入面最常見嘅一種口音差別 —— “s,c,z”發音！

西班牙本土最主要嘅口音派別有seseo、ceceo同distinction，以下會逐個講解係咩嚟。事先聲明，由於英文同西班牙文都係用拉丁字母，而香港人比較熟悉英文，所以以下唔同口音會用返英文嘅發音做對照同講解，會比較易明👍

♦️Seseo

首先，Seseo係將西班牙文字母“s”、”c”、”z”音讀做 /s/音嘅意思，同英文嘅s音係一樣嘅。舉個例，西班牙文數字”5”係”cinco” ，佢哋會將第一粒音讀成英文 ”sin”(中文「先」)音 。呢種讀法嘅起源同分佈主要係西班牙Islas Canarias同南部Andalucía嘅部份地區，例如Sevilla同Córdoba市中心，及後影響到大半個打丁美洲嘅讀音都採用seseo嘅讀法，所以聽拉丁神曲”Despacito”個 ”ci”字大家聽到”si”音就係咁解喇～

♦️Ceceo

而另一個派別ceceo讀法就完全相反，係將西班牙文字母“s”、”c”、”z”都讀成/θ/音，即係英文嘅 ”th-” 音。用返 ”cinco” 呢個例子，第一粒音就會讀成英文”thin” 音；西班牙文數字 ”6” 係 ”seis”，佢哋會讀成”TH-eis”。 呢種讀法嘅分佈都係南部Andalucía地區居多，例如Huelva南部同Cadiz嘅郊外地區，但係喺打丁美洲嘅普及度就比起seseo低好多。

有人會取笑ceceo嘅人講嘢「漏風」，但實情係佢哋分得清s音同th音㗎，只係佢哋嘅讀法唔會讀s音，所以唔好冤枉佢哋！

♦️Distinction

最後嚟到distinction，佢係兩者混合嘅版本，即係將西班牙文字母 “s” 讀返 /s/ 音，將 ”c” 同 ”z” 讀成 /θ/ 即係“th-”音。用返上面嘅例子，”cinco” 會讀做 ”TH-inco”，而 ”seis” 就照常用 ”s” 音開頭而唔係 ”th” 。呢種派別喺西班牙本土其實係最普遍嘅，南部以上絕大部分地區都係沿用呢個讀法，而外國人嚟到西班牙學西文都係以呢個作為「正規」讀法。（所謂「正規」其實都係睇多數人用邊種，去到打丁美洲嘅話「正規」讀法就係跟seseo喇）

以上三個就係構成西班牙文唔同口音嘅主要派別喇，當然仲有其他口音差別，例如yeísmo同lleísmo，不過今次篇幅有限就唔講住喇，如果大家對西班牙文口音有興趣嘅話我哋之後再分享更多！

(圖片來源：https://transpanish.biz/translation_blog/seseo-ceceo-and-distinction/)