預祝情人節快樂🎊 無論有冇伴侶，都祝大家過得幸福自在！
除咗每年2月14日，大家又知唔知原來西班牙仲有另一個獨特嘅日子會慶祝情人節呢？佢就係4月23日「聖喬治日」（Diada de Sant Jordi）。聖喬治同時都係加泰地區嘅「守護神」，所以呢日同時係加泰自治區嘅鎮守節。今日就等我哋就嚟探討吓呢個4月嘅特別節日。
聖喬治日其實係唔少天主教國家或地區嘅重要慶典，英格蘭、葡萄牙以及西班牙嘅加泰地區等都會熱烈慶祝。傳統上，呢一日男士會向女士贈送玫瑰，而作為回禮，女士就會回送一本書。時至今日，雙方都會互相送書同玫瑰。呢個節日唔單止係為咗慶祝愛情，同時都係推廣閱讀習慣嘅「世界閱讀日」。如果你去到巴塞隆拿嘅La Ramba，你哋會見到多不勝數嘅花卉同書籍攤檔，成個城市都充滿浪漫嘅氛圍㗎！
聖喬治日嘅起源可以追溯到中世紀。根據民間神話，當時惡龍為患，城鎮每日都要犧牲一位國民作為祭品，正當某日國王準備要犧牲公主嘅時候，聖喬治主動請纓同惡龍決鬥，最終一劍刺殺惡龍。喺龍濺出嘅血之中，仲誕生咗一朵紅玫瑰，聖喬治將玫瑰送咗俾公主。自此之後，玫瑰就象徵著愛同勇氣，成為情人節嘅代表禮物。而書籍之所以會成為禮物之一，係因為莎士比亞同塞萬提斯等偉大作家都不約而同喺4月23號離世，大眾喺呢日送書以表達對呢班作家嘅敬意。呢個習俗同聖喬治嘅神話巧合地落喺同一日，並受大眾嘅熱烈追捧，久而久之就變成現今送書同玫瑰嘅習俗。
以後除咗慶祝情人節，都不妨喺聖喬治日透過送玫瑰同書來表達心意啦～希望大家能夠帶住呢份浪漫同勇氣，好好追尋求所愛！💖
———
📚每週分享各種文化差異及趣聞
Instagram: calle_hongkones
Facebook: Calle Hongkonés 西遊記
Youtube: Calle Hongkonés
———
#西班牙 #情人節 #玫瑰 #聖喬治日 #世界閱讀日 #本地品牌 #西遊記 #spain #valentinesday #rose #worldbookday #diadadesantjordi #santjordi #sanjorge #callehongkones