【甜品篇｜全部都係焦糖燉蛋？】

上回提到壽司郎名物卡達拉娜其實係西班牙甜品crema catalana嘅改版，而好多人可能會疑惑：「咁呢款西班牙焦糖燉蛋同法式焦糖燉蛋 crème brûlée 有咩分別？」「西班牙有款natillas又係燉蛋喎，係咪同一樣嘢嚟？」以下將會為大家一一解答～

♦️Crema Catalana VS Crème Brûlée

呢兩款甜品無論賣相、味道定質感都非常相似，但係都有啲細微嘅分別。首先crème brûlée 會用淡忌廉溝牛奶做base，但係crema catalana淨係會用牛奶，出到嚟嘅質感會比起crème brûlée再軟身啲。第二個分別係味道，crème brûlée一般都會加入雲呢拿籽作為香料，食落會有雲呢拿香；但係crema catalana係唔會落雲呢拿嘅，反而係用檸檬皮同玉桂做香料，食落嘅香氣會比較清新少少。（卡達拉娜都有落雲呢拿籽，理論上味道係更接近crème brûlée㗎）

不過兩款甜品似得咁交關，究竟邊個出現先㗎呢？又有冇抄襲成份呢？呢個就可以追索返去17世紀嘅法國，當時嘅法國廚師François Massialot 喺1691年推出咗crème brûlée，聲稱係自創嘅新款甜品，但係做法就同14世紀已經有被記載嘅西班牙甜品crema catalana非常類同，佢當時嘅食譜並冇雲呢拿，而係用檸檬皮、玉桂同蜜餞橙皮作為香料，加入牛奶慢煮，呢個正正就係crema catalana嘅用料同做法。所以起源上，crème brûlée其實好有可能係François Massialot喺某個crema catalana嘅食譜上「參考」返嚟嘅，隨後有唔同演變先變成現今做法嘅crème brûlée～


♦️Crema Catalana VS Natillas

而natillas又係乜嘢呢？簡單嚟講，Natillas就係crema catalana唔要塊焦糖，即係齋燉蛋。佢嘅做法同用料基本上一樣，都係用牛奶、蛋、檸檬皮等材料混合慢煮而成，起源都係嚟自西班牙。換句話說，佢其實就係crema catalana嘅前身，只係後來有廚師諗到喺上面加糖再燒焦，先演變成焦糖燉蛋。

食法上，natillas通常會配瑪利餅、可可粉或玉桂粉食用，係一款傳統嘅住家甜品～

講咁多，終於解通咗呢幾份焦糖燉蛋錯綜複雜嘅關係喇，真係要推舉返個「祖傳正宗」出嚟嘅話，就應該係年代最久遠嘅natillas喇，佢既係crema catalana嘅雛形，又間接被「參考」到法國變咗crème brûlée，最後嚟到亞洲仲變埋風靡全城嘅卡達拉娜，絕對係個嚟西班牙嘅話必定要試嘅甜品！

P.s. 最後一頁卡達拉娜有啲嘢講