【甜品篇｜西班牙傳統甜品Torrija】

小編最近食甜品嘅時候靈機一觸，發現一啲大家喺香港一定食過嘅甜品其實都同某啲西班牙傳統甜品好相似，甚至有「血緣關係」！所以嚟緊會一連三post同大家分享吓西班牙有邊款甜品帶到呢種熟悉感俾我哋～

首先要介紹嘅，係呢款名為Torrija嘅西班牙傳統炸麵包片，可以理解為西班牙式嘅「法式西多」，通常就喺聖週同復活節嘅時候食嘅，做法係將檸檬/橙皮、肉桂條同雲呢拿籽加入熱牛奶撈勻，然後將切好嘅麵包片浸入去（仲可以加少量紅酒），等佢索一陣之後就包一層蛋漿再拎去炸，炸好之後淋蜜糖、蘸啲糖同肉桂粉就完成㗎喇。

如果第一次食真係會有食港式西多士嘅既視感！因為兩者都係甜甜地又香口嘅炸多士，味道都有3分似～但係同港式西多士唔同嘅係，質地上Torrija會因為浸過熱牛奶而更加淋， 淨係得外面薄薄一層嘅炸皮係脆；而且味道上會因為有肉桂同雲呢拿所以香料味比較濃郁。同時，torrija係唔會加花生醬/牛油/煉奶，所以風味的確有啲唔同～ (以上為小編用主觀味覺客觀分析🥸）

而有趣嘅係，港式西多士同西班牙嘅torrija係有啲「血緣關係」㗎！據說西多士最初係羅馬帝國時期出現嘅，因為嗰時嘅人唔想浪費食剩嘅麵包而萌生出呢個浸蛋液煎成多士嘅概念，希望為就嚟變壞嘅包加添一番風味，去到法國變咗叫”Pain Perdu”，意思即係“lost bread”，正正就係因為用食剩嘅麵包而得名。而鄰近嘅西班牙都share住相似嘅飲食文化，所以就衍生出非常似pain perdu嘅torrija喇。純粹烹調習慣唔同，西班牙會用橄欖油炸麵包而法國會用牛油煎，其餘大致一樣。

至於香港嘅西多士，其實係20世紀由法國商人引入嘅，但始終係「來佬貨」，算係貴價食物，得當時上流社會嘅階層先有機會食到，普羅大眾食到嘅都係冰室嘅簡化版，即係無餡多士加糖漿/煉奶，之後經過多年嘅轉化，西多士順應香港人口味而加入咗唔同餡料同味道，就變咗本地嘅特色食品喇～而現今好流行嘅花生醬版本其實都係近代先出現，味道質感都同原版嘅好唔同，算係西班牙torrija嘅「遠房親戚」喇～