相信大家對意大利雪糕Gelato呢個名都唔會陌生，咁你又知唔知佢同西班牙雪糕”Helado”有咩分別呢？
“Helado”係西班牙同拉丁美洲對雪糕嘅稱呼。除咗個名唔同，兩者用料上都有啲分別，Gelato基本上只用全脂奶，而Helado會用奶加蛋黃/cream (取決於每間雪糕店嘅做法）。質地上，Helado相對於Gelato質地都更加輕盈，原因係製作過程之中helado攪拌速度較快，過程會混入空氣，但攪拌Gelato嘅機器速度非常慢，混入嘅空氣較少，質地較杰身，所以兩者嘅濃稠度係有分別㗎～
不過兩者相似之處在於，Helado同Gelato都非常依賴新鮮原材料，例如水果、堅果等，亦用較多牛奶、較少cream，所以質量好嘅Helado同Gelato味道會比起軟雪糕濃郁好多，脂肪含量都比軟雪糕低，喺歐洲見到嘅雪糕通常都係佢哋，味道五花八門，甚至越嚟越有創意添～（小編見過醃製火腿味🤯）
唔知你哋又有冇見過/試過啲奇特味道嘅雪糕呢？🍨🍦😋
