【甜品篇🍰｜巴斯克蛋糕係上世紀產物？】

巴斯克蛋糕大家都應該聽過/食過，但係你又知唔知佢同西班牙有咩關係呢？

♦️起源
巴斯克蛋糕(Tarta de Queso Vasca) 嘅起源其實係嚟自西班牙北部嘅País Vasco，發明呢款cheesecake嘅人就係Café La Viña入面嘅chef — Santiago Rivera。

自1987年起，Santiago就開始喺餐廳返工，由於好想「發明」啲新嘅菜式，佢會成日喺廚房mix & match唔同嘅甜品、改吓唔同甜品嘅整法，一路佢都整過唔少新嘅食譜，而第一件巴斯克蛋糕嘅出現，就係1988年喇！💡

Santiago表示，佢最初係想將朱古力慕絲入口即溶嘅口感放到入芝士蛋糕度，所以材料會用較順滑嘅cream cheese；而焗法當然就要簡單粗暴 — 高溫令表面烤焦，但同時確保中心係半溶狀態；為咗確保口感，佢冇將常見嘅曲奇餅底加入去，目的就係每啖都係入口即溶嘅芝士，唔需要太多咀嚼。

♦️爆紅契機
不過，由巴斯克蛋糕嘅出現到真正流行起嚟，中間確實經歷咗非常長嘅時間。Santiago話其實到1997年左右，佢餐廳嘅巴斯克蛋糕先開始大賣，原因係因為當時佢冇再放蛋糕入雪櫃、反而放出咖啡機隔離，一嚟更顯眼、二嚟室溫令質地更加流心，結果呢款招牌甜品好快就喺當地流傳開去～ 2000年代起歐美地區都開始有佢嘅食譜；而亞洲各地就到2018年先開始流行，已經係第一件巴斯克蛋糕嘅出現嘅30年之後！⏳