【 除夕夜倒數要食提子？ | 文化差異—除夕篇】

話咁快嚟到2023年，首先祝大家新年快樂！🎆 講起除夕夜，當然不得不提西班牙人嘅過年習俗 — 食提子🍇

西班牙嘅除夕夜叫”nochevieja”，當正式進入新一年嘅0時0分，新年嘅12下鐘聲就會敲響，西班牙人會跟住每下鐘聲食一粒提子，總共12粒，每粒代表住來年嘅各個月份，喺12下鐘聲之後成功吞晒所有提子就代表來年順順利利喇～

據聞呢個習俗嘅出現係因為1909年嘅西班牙經歷咗一場提子大豐收，果農為咗促銷，就提出咗「幸運提子」嘅宣傳，叫國民一齊喺倒數嘅時候食12粒提子，話會帶嚟好運。點知呢個宣傳非常成功，呢個習慣亦都慢慢流傳落嚟，隨之變成而家嘅倒數習俗。