今次想同大家分享一啲喺Granada(西班牙南部)省錢嘅嘅小貼士。
無論你係嚟留學，、移民，或者旅遊，希望呢啲方法都可以幫到你喺Granada慳到少少錢啦～
🍷 貼士 1: Free Tapas!
喺Granada嘅酒吧同餐廳嗌野飲 通常都會送你一份免費嘅小食，即係「tapas」～ 換言之，你只需要比一杯嘢飲嘅價錢就可以有多一份小食！ 而嗰份小食會係咩呢？每間餐廳每日都唔同嘅，常見例子有：一人份量嘅paella/arroz negro，小三文治、小漢堡包，或者炸魚、炸雞肉配薯條等等… 有啲西班牙人夜晚唔想食太多/唔想花錢食晚餐嘅話，都會就咁行入去酒吧嗌杯嘢飲，食個小食。
🍴 貼士 2:「Menu del Dia」
嚟到西班牙梗係要享受吓呢度嘅美食啦，Granada呢度都有好多好好食嘅餐廳，但係唔少餐廳單點一款菜式嘅價錢其實都唔平，通常都要10-20€，有啲可能會仲貴。 而如果想食多幾味餸，再嗌埋嘢飲同埋甜品嘅話，全部嘢都單點就會好貴。 所以如果大家想慳錢又想食多幾款餸嘅話，可以揀”Menu del Dia”～
呢度好多餐廳平日嘅午市都會有得比你揀”Menu del Dia”，佢係一個實惠嘅套餐。通常包括頭盤、主菜、飲品，餐包同甜品。價錢相當經濟實惠，通常會係11€-15€左右。 換言之，你可以用單點一碟餸嘅價錢食到幾樣嘢，所以其實係幾化算㗎～
🚶♂️ 貼士 3: 行多啲～
Granada係一個小城市，大部分地方都可以步行到達。所以如果想慳錢嘅話可以搭少啲車，行多啲。慳返交通費嘅同時又可以欣賞城市嘅景色。
🍳 貼士 4: 自己煮飯
如果成日去餐廳食飯嘅開支會好大，但係呢度超市嘅物價相對香港較低，所以如果自己買餸煮飯嘅話係可以慳返唔少～
🎓 貼士 5: 學生優惠
如果你係嚟Granada留學嘅學生，記得喺購物、餐廳同景點入場時出示學生證！呢度有好多地方都有學生優惠㗎，所以記住要好好善用自己嘅學生優惠啊～
💰 貼士 6: 選擇budget friendly嘅活動
其實Granada絕對係一個budget friendly嘅城市！都有好多活動同埋體驗係唔需要用到錢嘅，例如去觀景台飽覽成個市鎮嘅風景或者去沙灘享受下陽光與海灘等等…
希望以上嘅呢啲小貼士可以幫你慳到錢之餘同時都享受到當地嘅生活同文化啦。 如果你仲有啲咩慳錢秘笈都可以喺下面留言話俾我哋知架～