【甜品篇｜鳥結糖🍬 】

唔知大家對鳥結糖(西班牙文：turrón) 嘅印象係點㗎呢？小編表示：好痴牙~ 不過自從嚟咗西班牙之後，對鳥結糖嘅印象就大大改變喇，想知點解？睇埋落去啦！

♦️來源
自從摩爾人將鳥結糖嘅食譜傳入西班牙後，呢樣甜品慢慢變得在地化，並發展出自己嘅傳統習俗。如今鳥結糖喺西班牙係有原產地標籤保護嘅甜品，簡單啲講係有住品質同來源嘅官方認可，當中最享負盛名嘅就係東南部城市Jijona同Alicante出產嘅鳥結糖。

作為西班牙聖誕節嘅特色甜品，鳥結糖可謂係呢個節日嘅象徵。西班牙舉國上下幾乎每間超市都會擺滿各式各樣嘅鳥結糖作招倈，本地人好鍾意用嚟做飯後甜品/送禮。
（普及程度有如香港嘅藍罐曲奇/金莎朱古力）

♦️分類
時至今日，西班牙鳥結糖嘅口味已經多不勝數，由最基本嘅杏仁、榛子等，到fusion啲嘅朱古力、烈酒、churros味都有，但係種類大致只有兩種：軟身(blando)同硬身(duro)。

軟身嘅鳥結糖有入口即溶嘅綿密嘅口感，質地軟身韌性低，產地為Jijona；硬身嘅就口感爽脆、非常乾身，通常嚟自Alicante。而兩款都係完全唔痴牙㗎！😝